Црвената планета - МАРС

Мал и црвен по боја, Марс повеќе наликува на Земјата од која и да било друга планета. Луѓето некогаш верувале дека на Марс живеат интелигентни суштества, но вселенските сонди покажале дека на планетата нема ниту Марсовци ниту каков и да било друг живот. Премногу е студено и атмосферата е премногу ретка за да може животот да опстане.

Зошто Марс се нарекува „црвена планета“?

Астрономите велат дека Марс е „црвена планета“ поради неговата боја. Имено, површината на планетата е црвеникаво-портокалова. Оваа боја доаѓа од железните минерали налик на `рѓа во површинските карпи и во почвата.

Податоци за Марс

Пречник на екваторот: 6787 километри

Просечно растојание од Сонцето: 228 милиони километри

Минимално растојание од Земјата: 56 милиони километри

Се врти околу оската за: 24 часа и 37 минути

Кружи околу Сонцето за: 687 Земјени денови

Температурата на површината: од минус 110 до 0 степени

Сателити: 2 (Фобос и Демос)

Од што е составен Марс?

Марс е карпеста планета со сличен состав како и Земјата. Има цврста кора, карпеста обвивка и железно јадро. Но неговата атмосфера е многу поретка од таа на Земјата. Главниот гас во атмосферата на Марс е јаглеродниот диоксид. Во атмосферата има многу малку влага, а на површината нема океани, езера или реки. Околу половите на планетата влагата замрзнува и ги формира поларните капи од мраз.